Nu juarnu i sira a tarda ura
Quandu ali tiarri si cojjia lu mijju
Arriva na mbsciata cu premura
Ad'Orcisanu nci nesciu nu fijju
Eranu viarzu i sie u quattru i settembre
Duve si cojjia u mijju era o Golio
A notte non chiudiu uacchiu pe nente
Tuttu cuntiantu ringraziandu a Dio
Fuarzi nta mianti sua vidia u futuru
Duappu quattru fimmani nu masculu nescia
Si facia u cuntu di quantu lavuru
Stu nuavu natu fare nci potia
A cuntentizza durau pe bellu tiampu
La sira l'annacava e l'abballava
Pero' dinta a u sua sentimiantu
U volia rande e pemmo lavurava
Finda a dudici anni a scola jiu
E arrivau a quinta elementare
Apprissu matina priastu lu sbattiu
Levati, ca mo ti tocca di zappare
Ciangiandu finda a Puarru arriadu d'iju
Quandu Cola i Giabbia disse: "Chi ti ciangi?
Ormai si a menza strata e io non criju
Ca a decisiuani i patrita tu cangi"
Arrivamme findarmente a lu Golio
Mi porgiu na zappa e non disse nente
Passamme tutta na jornata iju e io
Tutti i dui ccittu, silenziosamente
Quandu tornamme a casa pue a sirata
A tavula pe mangiare era lesta
Nto cuari mi sentia na pistolata
E nnu turmiantu rande nta la testa
A sorta mia era ormai gia distinata
No arti, no mistari, a scola ormai finuta
Sta cazza i zappa non mme mai piaciuta
No comments:
Post a Comment